ÞRÖSTUR Í TRÉ - Kammertónleikar
Miðvikudagskvöldið 18. mars kl. 20:00 hefst tónleikaröð Félags íslenskra tónlistarmanna í samvinnu við Norræna húsið. Flytjendur á þessum fyrstu tónleikum starfsársins verða Ingibjörg Guðjónsdóttir, sópran, Einar Jóhannesson, klarinett, og Valgerður Andrésdóttir á píanó, Trio Varioso. Þau munu flytja blandaða efnisskrá, með ljóðasöng og tónverkum eftir íslensk og dönsk tónskáld fyrir hlé, Hafliða Hallgrímsson, Atla Heimi Sveinsson, Peter Heise og Niels W. Gade. Eftir hlé mun frönsk og þýsk sveitastemmning vera ríkjandi en þá verða flutt verk eftir Schubert, Chausson og Pierne. Á tónleikunum verða frumflutt tvö lög eftir Atla Heimi Sveinsson sem hann hefur skrifað fyrir tríóið, Þröstur í tré við sjúkrahús og Skógarhind.
Aðgangseyrir á tónleikana er 1.500 kr en ókeypis er fyrir nemendur og ungt fólk að 21 árs aldri.

Um tónleikaröðina

Tónleikaröð FÍT var á síðasta ári haldin á Kjarvalsstöðum í samvinnu við Listasafn Reykjavíkur við góðar undirtektir áheyrenda. Af óviðráðanlegum ástæðum varð ekki framhald á því samstarfi en í staðinn hefur verið tekið upp samstarf við Norræna húsið með aukinni áherslu á norrænt og alþjóðlegt samstarf. Tilgangurinn með tónleikaröðinni er að gefa áheyrendum tækifæri til að hlýða á fyrsta flokks innlenda og erlenda listamenn með áherslu á “sólistann” annars vegar og “kammertónlist” hins vegar.

Tónleikarnir verða ávallt á miðvikudagskvöldum og eru fernir á starfsárinu 2009, tvennir með íslenskum flytjendum og tvennir með norrænum flytjendum fyrir samvinnu FÍT við norræn einleikarafélög í Nordisk Solistråd. Miðaverði er stillt í hóf og er sérstaklega reynt að hvetja til aðsóknar ungs fólks með því að veita þeim frían aðgangseyri.

Stjórn tónleikaraðarinnar sér um framkvæmd og skipulagningu auk listrænnar stjórnunar. Tónleikastjórn skipa: Laufey Sigurðardóttir, Hallveig Rúnarsdóttir og Jón Sigurðsson.

Aðrir tónleikar starfsársins:

Miðvikudagur 20. maí kl. 20:00
“Hinn djúpi tónn” - Finnskir einleikarar
í samvinnu við Suomen Solistiyhdistys:
Harri Lidsle, túba
Kyoko Matsukawa, píanó

Miðvikudagur 16. september kl. 20:00
“Samræður snillinga” - Danskir einleikarar
í samvinnu við Dansk Solist-Forbund:
Michala Petri, blokkflauta
Lars Hannibal, gítar

Miðvikudagur 21. október kl. 20:00
“Fegurð flautunnar” - Einleikstónleikar:
Martial Nardeau, þverflauta